Er Ajuntament de  Naut Aran a iniciat ua accion entà que, quinsevolh vesin interessat, pogue cedir o véner era sua finca de finalitat rustica o urbanizable entà qu’es autocaravanes e veïculs de mès de 5 mètres poguen estacionar o pernoctar. Damb aguesta accion se vò milhorar era problematica actuau d’aguest tipe de veïculs enes sasons de maxima afluéncia.

Cau rebrembar qu’era lei indique que s’es finques son de caractèr rustic coma molt se pòt estacionar pendent un periòde de 48 ores de forma rotacionau e se son urbanes poderien pernoctar sense cap problèma. Eth consistòri prepause era crompra o eth loguèr damb posterior concors public entà poder generar ua solucion ath volum d’autocaravanes e veïculs de mès de 5 mètres qu’arriben ath municipi sustot ena sason d’iuèrn.

Ath long d’aguesta sason s’a detectat ua milhora ena convivéncia mès sense presentar toti es permisi que demanaue er ajuntament.

Es requisits qu’an de complir es finques que se volguen véner o logar son, per exemple, qu’auràn d’auer ua pendent arribenta inferior ath 20%, que non agen problèmes d’inundabilitat, lauègi o d’auti risqui geologics e aurà de compdar damb un accès rodat adequat que pogue perméter era circulacion de veïculs, en tot inclodir es madeishes autocaravanes o d’auti de mès de 5 mètres.